Чест и задоволство беше да се присуствува на одбележувањето на 135 години од раѓањето на светски познатиот охриѓанец, д-р Атанас Коцарев, кое се одржа вчеравечер во Скопје. Неговите научни онколошки достигнувања во една од најделикатните и најболни медицински сфери допринеле да се спасат многу животи и токму поради тоа сето она што ќе го кажеме за него е премало, недоволно, едноставно.
Со ликот и делото на д-р Коцарев, Охрид ја комплетира својата биографија како место од кое потекнуваат голем број истакнати великани, кои оставиле значаен печат низ неговото милениумско постоење.
Општина Охрид веќе отпочна низа подготовки и активности со цел името на д-р Коцарев да го добие своето заслужено место во мозаикот на непроценливи вредности, кои внимателно ги чуваме и почитуваме. Ќе поведеме иницијатива за соодветно обележување на родната куќа на д-р Коцарев во Охрид, која подоцна би прераснала во музеј. Исто така, планираме да спроведеме постапка за именување на улица и медицинска установа со неговото име и да поведеме иницијатива, во наставните програми за учениците да се изучува за неговите научни достигнувања.
Сите овие наши планови и активности нема да бидат комплетни ако тука не бидат вклучени и Франција и Швајцарија, неговите втори татковини каде по волја на судбината и животните патишта таму студирал, работел и ги создал неговите највредни наоди и научни трудови. Токму во таа насока, мојот тим веќе работи на усогласување на меморандум за соработка со општина Бонди, како прв чекор кон збратимување и воспоставување на партнерство помеѓу двете општини.
Нека му е вечна славата на д-р Анастас Коцарев кој спомен го чествуваме денес за да не биде заборавен и од идните генерации.
Пишува Кирил Пецаков градоначалник на Охрид.
