Кавадаречкиот музичар Мики Тралала и годинава, по вторпат пред почетокот на училишната година ќе израдува голем број на деца – ученици од социјално загрозени семејства. Ќе им донира училишни ранци и прибор, со цел почетокот на школската година да го дочекаат со радост и да не се чувствуваат поразлични од своите врсници.
Неговата иницијатива ,,Секое дете заслужува исти можности” за првпат беше реализирана лани, кога јавно ги повика сите на кои им е потребна помош да го контактираат на социјалните мрежи, а потоа спонтано, иницијативата прерасна во нешто поголемо, бидејќи голем број на граѓани посакаа да се вклучат со своја донација.
На крај, беа поделени 300 училишни ранци и прибори на деца на самохрани родители, и на деца чии семејства се од социјален ризик.
Се надевам дека годинава иницијативата ќе има уште поголем одек, бидејќи добар дел од јавноста веќе слушна за неа. Не станува збор само за донации на ранци и училишен прибор за деца од Тиквешијата, туку доколку се соберат повеќе материјали, истите ќе бидат испратени на било кој крај во земјава.
Затоа, ги замолувам сите на кои им е потребна донација во вид на ранец и прибор, како и сите оние кои сакаат да се вклучат со своја донација, да ме контактираат на социјалните мрежи, за да се организираме со време, вели Мики.
Инаку, оваа иницијатива музичарот ја започна неколку месеци откако почина неговата сопруга Тања Маџунков, со која во минатото заедно настапуваа како дуо Тања и Мики Тралала, а исто така беа иницијатори и организатори на низа на хуманитарни настани во Тиквешијата.
Тања почина на 33-годишна возраст по кратко боледување лани во јуни, и не дочека да го испрати нивниот син на првиот училишен ден. Токму поради тоа, а и поради аманетот кој и го дал на сопругата, дека ќе продолжи со нивната мисија, секогаш кога може да помага, Мики ја започнал акцијата со ранците.
-Тања беше многу емотивна, срцето и се кршеше кога ќе видеше дека некое дете живее во немаштија, и постојано кажуваше дека најмногу би сакала сите деца да растат со исти можности. Токму поради тоа и настапувавме хуманитарно безброј пати на матурски забави, купувавме облека за матуранти чии семејства тоа не можеа да си го дозволат, сакавме да дадеме свој придонес за некому да му ја разубавиме забавата и да направиме тие матуранти да се почувствуваат посебно, се сеќава Мики.
Минатата зима тој започна и со акција за собирање на топла облека и обувки за деца од социјално загрозени семејства, а се најде и во улогата на организатор на хуманитарни музички настани во градот, реализирани со цел да се соберат пари за лекување на негови сограѓани.
Сега, во пресрет на новата училишна година, јавно ги повикува сите на кои им е потребна помош, но и сите оние кои сакаат да се вклучат како донатори, да го контактираат, за повторно да израдуваат голем број на ученици.
Вики Клинчарова. .Вики.Мк
