Животната приказна на Драги Јовановски – Џина е полна со болка, неправда и избори кои го однесле по патот на криминалот. Тој е човекот со најдолг затворенички стаж во Македонија, а за ТВ Стар отворено зборува за својата судбина.
„Од 35 години што ги одлежав, 15 ми беа наместени. Сум видел и доживеал сè зад решетки. Јас сум човекот кој најмногу време поминал во затвор во оваа држава,“ вели Џина.
Детството – почеток на една траума
Животот му бил тежок уште од најрана возраст. „До 13 години очувот ме тепаше безмилосно, а јас се спротивставував. Наместо заштита, добив институционално казнување – ме однесоа во дом за сираци. Таму научив сè што не треба и тргнав по патот од кој враќање немаше,“ раскажува тој.
Живот зад решетки
Годините во затвор биле исполнети со неправди, но и со тврда борба за опстанок. „Криминалот мене ме избра за негова жртва. Повеќе време поминав во ќелија отколку на слобода. Човек таму или ќе се скрши, или ќе се зацврсти. Јас преживеав,“ додава Џина.
Исповед со порака
И покрај долгите години зад решетки, тој сака неговата приказна да биде поука за младите. „Да не го газат патот што јас го газев. Мислиш дека криминалот е сила, а всушност е стапица. Те јаде полека, додека не ти го украде цел живот,“ порачува Јовановски.
Видео ТУКА
