Хаос со првачињата во Дебрца – само 20 деца, а премногу училишта
Новата учебна година во општина Дебрца започна со вкупно само 20 првачиња распоредени низ бројни основни училишта во помалите населени места. Проблемот е што дел од децата учат во мешани паралелки, а има училишта каде во клупите седи едно или максимум две првачиња.
Родителите револтирано реагираат и велат дека Министерството за образование и наука мора конечно да најде трајно решение – со создавање централно училиште каде сите деца би учеле заедно, наместо да се одржува систем во кој по селата постојат празни училишни згради со едвај неколку ученици.
„Не е нормално детето да седи само во клупа и да нема со кого да се дружи. Ние не сакаме нашите деца да растат во вакви услови“, велат родители од Дебрца.
Состојбата, според нив, е хаотична и дополнително влијае на квалитетот на наставата, бидејќи наставниците се принудени да држат часови во мешани паралелки со ученици од повеќе одделенија.
