Марина Николова (38) од селото Пепелиште, Неготино, е една од ретките жени во Македонија која управува со шлепер и професионално вози низ Европа.
Животот на село ја научил на работа со трактор и механизација, но пред неколку години решила да направи голем чекор и да положи за камион. Причините, вели, биле практични – подобра заработка и желба да му се придружи на сопругот, кој исто така е возач.
„Работата е мачна, постојано си на пат, низ цела Европа. Ќерка ми сака и таа да биде како мене, но јас не би и препорачала. Шоферскиот живот изгледа убаво од страна, но носи големи жртви,“ раскажува Николова за Шило Магазин.
Иако на почеток многумина со неверување ја гледале зад воланот на шлепер, со време почнале да ѝ се восхитуваат. „Во Македонија сепак е реткост жена да вози камион,“ додава таа.
Денес Марина работи во транспортната компанија „Јаја“ и ја докажува својата упорност и храброст, покажувајќи дека и жените можат успешно да се справат со професија која со години важела за машка.
