Двојно убиство и самоубиство извршено со остар предмет во семејна куќа во Велес ја потресе јавноста денес. Според полицијата, маж од Скопје денеска ги убил поранешната партнерка и нејзиниот татко, па се самоубил.
Само неколку часа пред да се случи настанот, Росица К. која е една од жртвите, била излезена во градот. За ВИКИМЕДИА велешани кои ја сретнале, велат дека се во шок од веста и ја дочекале со неверување.
-Ја сретнавме Росица во маркет во градот, пазареше нешто, а потоа беше на каса пред нас. Млада девојка, пред која стоеше целиот живот. Кога околу 16 часот во градот проструи веста за убиствата, ја дочекавме со неверување, останавме занемени. До кога ќе сведочиме на вакви настани, на свирепи убиства, на фемициди и на згаснати невини животи, прашуваат велешани.
На социјалните мрежи пак, веќе се пишуваат коментари од лица кои ја познавале жртвата, и кои истакнуваат дека убиецот и во минатото и се заканувал на Росица, и бил пријавуван во полиција.
Околу тоа дали се евидентирани закани или напади врз жртвата, од страна на нејзиниот поранешен партнер, од СВР Велес за ВИКИМЕДИА изјавија дека ќе излезат со официјални податоци за кратко време.
Како што соопштија од Секторот за внатрешни работи Велес, во 15:30 часот било пријавено е дека на ул.,,Кочо Рацин“ во Велес е пронајдено женско лице со повреди од остар предмет.
-На местото излегоа полициски службеници и констатираа дека се работи за Р.К.(31) од Велес, која од Итна медицинска помош е пренесена во болницата во Велес, каде што е констатирана смрт. Веднаш потоа, во домот на нејзиниот татко на истата улица, пронајден е починат и татко и К.К.(74) , кој исто така, имал повреди од остар предмет. Во домот со повреди од остар предмет е пронајден и И.С.(39) од Скопје, поранешен партнер на Р.К., за кој според првичните информации постои сомнение дека ги нападнал двајцата, по што сам се повредил. Откако е пренесен во болницата во Велес и кај него е констатирана смрт“, соопшти СВР Велес.
Увид врши јавен обвинител во содејство со увидна екипа на СВР Велес и се преземаат мерки за расчистување на случајот.
Вики Клинчарова
