Возачот на комбето во кое се превезувала заболената патничка , пред неколку часа е пренесен во изолација во струмичката болница, откако алармирал дека има болки во градите и кашлица. Тој бил спроведен од медицинска екипа со полна заштитна опрема и на него му се прават тестови за корона вирусот, информира доцна попладнево министерот за здравство Венко Филипче.
„Пред неколку часата возачот на комбето сигнализирал дека има болки во градите и кашлица по што е спороведен е во болницата во Струмица, од страна на тим со полна заштитна опрема и се наоѓа во изолација. Тој е сам дома, нема никој од семејството, така што немал контакти со никого“, изјави Филипче.
Тој нагласи дека во зависност од тоа какви ќе бидат резултатите ќе се одлучи како ќе се постапува понатаму. Доколку тестот е позитивен тој ќе биде транспортиран да се лекува на Инфективната клиника во изолација, ако е негативен ќе продолжи да се лекува во струмичката болница, на одделение и не во изолација. Министерот рече дека се негативни резултатите кои се чекаа за пациентот од утринава.
Министерот Филипче потенцира дека строгите епидемиолошки критериуми за откажување на јавни собири се однесуваат само на двата карневали во Струмица и Прилеп, како и за спортските натпревари кои треба да се играат без публика. За театарски претстави и други настани на кои нема луѓе од странство рече дека нема потреба да се одложуваат.
Тој нагласи дека ќе се контролираат аптеките за кои имаат дојава од граѓани дека неоправдано ги зголемиле цените на заштитните маски, средства за дезинфекција и друг медицински материјал.
„Во овој момент нема строга епидемиолошка причина да се откаже било кој друг настан. Одлуката да се спореде контрола на цените и количините на заштитни маски и материјали дојде по информациите од граѓани дека се драстично зголемени цените. Не е коректно да се прави така и согласно тоа што ќе се констатира на лице место ќе следуваат мерки за тие што го направиле тоа“, изјави министерот Филипче.
Министерот уште еднаш повтори дека нема простор за паника, будно се следи состојбата од страна на експертите и во зависност од ситуацијата во секој момент може да се воведе нешто друго.
Им се заблагодари на сите лекари, медиумите, претставниците на МВР и сите што деноноќно ја следат ситуација , како и на регионалниот директор на СЗО, Ханс Клуге и преставничката на американската амбасада во Будимпешта која кажа дека нашата држава ги превзема сите мерки за справување и заштита од корона вирусот.
извор: тв нова
