Американски сенатор близок до претседателот на САД Доналд Трамп и Доналд Трамп Помладиот ѝ порачаа на Приштина да ги укине царините против Србија, а и навестија дека американските трупи треба да го напуштат Косово.
„Повеќе од две децении американските сили помагаат во одржувањето на мирот меѓу Косово и Србија. Сега, со историскиот напредок, Косово мора да го одработи својот дел и да ги укине сите царини наметнати на Србија. Ако Косово не е целосно посветено на мирот, тогаш САД би требало да го преиспитаат своето присуство таму“, напиша на Твитер американскиот сенатор Дејвид Пердју.
Овој твит веднаш го сподели и синот на американскиот претседател Доналд Трамп Помладиот, кој напиша: „Се согласувам. Имаме 650 припадници на војската на Косово. Ајде да ги вратиме дома“, напиша Трамп Помладиот.
Пердју, републиканец од Џорџија, стана првиот директор од листата Форчун 500 кој беше избран во Сенатот.
Додека ја градел бизнис кариерата работел на секој континент, освен на Антарктикот.
Исто како Трамп, Пердју немал политичко искуство сѐ до изборот во Сенатот во 2014 година. Но и не му е непозната политичката сцена, исто како американскиот претседател.
