Најверојатно утре, угостителските објекти ќе се соочат со нови, дополнителни протоколи за работи во време на пандемијата од коронавирусот. Според информации на ТВ21, од утре локалите ќе може да работат и по 22 часот, како по старото работно време.
Протоколи за работи очекуваат и хотелите, за кои од Владата велат дека ќе бидат објавени во следните денови.
„Ние како Министерство за економија во соработка со Министерството за здравство доставивме предлог, а од Комисијата за заразни болести бевме известени дека до понеделник ќе бидат изготвени дополнителни протоколи што се однесува на работењето на угостителските објекти, вклучувајќи ги тука и хотелите“, истакна Крешник Бектеши.
Како што дознаваме, ова лето ќе треба да се збогуваме со шведска маса, бидејќи тоа е дел од протоколите. Масите ќе бидат на раздалеченост, со тоа што една маса ќе може да биде поставена на 10 метри квадратни, со растојанието меѓу гостите од два метри. Тие, пак, ќе треба да бидат од едно семејство.
Од друга страна, дел од хотелските работници нагласуваат и дека Владата мора да разгледа можност за намалување на ДДВ-то, мерка веќе преземена во Бугарија и Грција.
На тешката финансиска состојба се жалат и угостителите од Тиквешијата кои на еден ден ги затворија своите бизниси и протестираа. Добиле ветување од Владата дека нивните барања ќе бидат разгледани на владина седница.
„На наредната владина седница, а најдоcна до вторник ќе бидат разлабавени мерките и тоа работно време во работни денови до 24 часот, а за викенди до 01. Ќе се овозможи и работа во внатрешните делови од објектите со одредени протоколи“, посочи Дане Белевски.
Мислење за се ова, се чека од Комисијата за заразни болести која треба да даде мислење и околу одржувњето на свадби во време на пандемија.
Министерот за економија, Крешник Бектеши додаде дека и во ситуација кога е истечена вонреднатат состојба, Владата има законска можност да носи протоколи како правни акти.
