Министерот за земјоделство, шумарство и водостопанство, Трајан Димковски, вчера од Струмица најави дека од понеделник повторно ќе може да се точи Еуродизел на бензинските станици на „Макпетрол“, за оние кои имаа и користеа картички за зелена нафта, а истовремено од понеделник ќе се делат и новите картички за земјоделците.
Директорот на платежната агенција, Николче Бабовски кажа дека земјоделците кои имаат картички од лани, ќе можат да точат Еуродизел гориво од понеделник по 10:00 часот, а земјоделците кои прв пат годинава стекнаа право за добивање на картичка за зелена нафта, веќе од понеделник ќе може да одат во Подрачните единици на Министерството за земјоделство, шумарство и водостопанство и да ги подигнат зелените картички.
Финансиската поддршка на платежната картичка зависи од големината на површините и земјоделските култури за кои конкурирале земјоделците за субвенции во 2019-та година.
„Преку оваа мерка, во овој момент опфаќаме околу 51.000 земјоделци. Вкупната поддршка за оваа мерка изнесува 224 милиони денари. Ова се сериозни средства кои ги враќаме кај земјоделците, токму во време кога имаат и најмногу активности на поле. Со оваа мерка, која што за првпат ја воведе Владата од минатата година, се придонесува за намалување на производствените трошоци, земјоделското производство е одржливо, а кај земјоделците остануваат повеќе пари“ – кажа министерот Димковски.
StrumicaNet.com
