Руската вакцина против коронавирусот „Спутник V“ ќе се произведува во Индија, Бразил, Јужна Кореја и Кина, најави денеска директорот на Рускиот фонд за директни инвестиции (RDIF), Кирил Дмитријев.
– Потврдуваме дека ќе можеме во декември да испорачаме големи количини. Ќе ја произведуваме вакцината во Индија, Бразил, Јужна Кореја, Кина и во уште една земја – изјави Дмитријев на една онлајн конференција.
Портпаролот на Кремељ, Дмитри Песков денеска рече дека „Спутник V“ активно се промовирала на светските пазари, па поради тоа побарувачката за неа значително се зголемила.
Тој рече дека вакцината на меѓународен план ја промовира Рускиот фонд за директни вложувања (RDIF), како и дека се многу успешни во тоа, но и дека е пристигна голем број на барања за вакцината.
Русија на 11 август соопшти дека регистрирала вакцина против коронавирусот наречена „Спутник V“ која ја разви истражувачкиот центар „Гамалеја“ при Министерството за здравство, како и дека клиничките тестирања се успешно завршени во јуни и јули.
