Како дел од дипломатските напори на Берлин за приближување на ставовите на Скопје и Софија со цел одржување на првата Меѓувладина седница со ЕУ и почеток на преговорите на Македонија за време на германското претседателство премиерот Зоран Заев денеска ќе разговара со германската канцеларка Ангела Меркел.
Заев вчера изјави дека по завчерашниот разговор во Берлин на вицепремиерот Никола Димитров и министерот за надворешни рбаоти Бујар Османи со бугарската министерка Екатерина Захариева, има оптимизам и треба да има оптимизам во однос на решавање на прашањето со Бугарија кој го гледа и во обраќањето на Захариева, но и во фејсбук статусот на премиерот Бојко Борисов.
Заев кажа дека е добредојдена помошта од Германија и оцени дека даваат резултати честите комуникации помеѓу работните групи и минситрите од двете страни, бидејќи се работи за две пријателски земји.
„Сега сме ние на ред, Република Северна Македонија треба да ги отвори поглавјата преку првата Меѓувладина конференција. Се трудам да има целосно разбирање. Двете страни сакаат да има решение“, рече Заев.
Инаку, Меркел вчера имаше видео-конференциски состанок со бугарскиот премиер Бојко Борисов.
„Се заблагодарив за нејзината лична заложба и онаа на германското претседателство за барање формули да се овозможи почеток на преговорите на Република Северна Македонија за членство во ЕУ. Верувам дека со помош на Германија, особено за време на нејзиното претседателство со Советот на ЕУ ќе се донесат силни и правилни одлуки“, напиша Борисов на Фејсбук за разговорот, кој траел 40 минути.
По извесниот напредок постигнат во понеделникот во Берлин на средбата на Димитров и Османи со Захариева на инцијатива на нивниот германски колега Хајко Мас, продолжуваат дипломатските напори во насока на приближување на ставовите на двете страни со цел овозможување на одржување на првата Меѓувладина седница со ЕУ за време на германското претседателство.
Во Брисел сѐ уште се води битка и на амбасадорско ниво од страна на Бугарија во нацрт заклучоците за преговарачката рамка да влезат дополнителни забелешки, но, барем засега, бугарските барања не се прифатени, јави МИА од Брисел, повикувајќи се на дипломатски извори. Ако се постигне договор денеска амбасадорите на земјите членки ќе можат да ја усвојат преговарачката рамка, во спротивно тие повторно ќе се состанат на оваа тема в петок, со надеж дека до тогаш ќе се надминат разликите и ќе се отвори патот министрите на 10 ноември да дадат зелено светло на документот.
Извор МКД.мк
