Турскиот претседател Реџеп Тајип Ердоган ги објави амбициозните планови на неговата земја за десетгодишна вселенска програма која вклучува мисии на Месечината, турски астронаути во вселената и развој на софистицирана сателитска мрежа.
Амбициозниот план на Ердоган беше откриен на свеченост на која тој рече дека Турција „ќе го оствари својот прв контакт со Месечината“ во 2023 година, одбележувајќи ја стогодишнината од формирањето на републиката.
„Со господ напред, одиме на Месечината“, рече Ердоган.
Првата фаза на вселенската авантура на Турција ќе биде соработка со други земји, проследена со мисија со употреба на ракети од турско производство. Ердоган рече дека Турската вселенска агенција (ТУА), основана во 2018 година, планира да соработува со меѓународната заедница во градењето на вселенски аеродром.
„Се надевам дека овој план, кој ќе ја однесе Турција во највисоката лига на глобалната вселенска трка, ќе биде успешно оживеан“, додаде Ердоган.
Додека некои се скептични, други веруваат дека планот ќе го намали одливот на мозоци од турското стопанство и ќе ги охрабри иноваторите да ја зајакнат позицијата на Турција во меѓународната заедница за истражување на вселената.
Ердоган неодамна разговараше со најбогатиот човек на светот, основачот на SpaceX, Илон Маск, а темата беше развој на вселенската технологија со учество на турски компании.
Во меѓувреме, кинеско вселенско летало без екипаж влезе во орбитата на Марс, само еден ден откако истото го стори и летало на Обединетите Арапски Емирати.
Американскиот ровер Perseverance ќе слета на површината на Црвената Планета на 18 февруари и ќе бара знаци на праисториски микроскопски живот и ќе собира примероци што ќе бидат пратени на Земјата.
