Партијата на бугарскиот вицепремиер Красимир Каракачанов, ВМРО, денеска објави соопштение во кое се вели дека пејачот Васил Гарванлиев следната година би можел да ја претставува Бугарија на Евровизија доколку Македонија го повлече од овогодинешниот настап, пренее бугарската агенција БТА.
„Евровизија е натпревар во пеење за слободни и за талентирани млади луѓе. Сè што се случува со претставникот на РС Македонија на Евровизија, Васил Гарванлиев, не кореспондира на кој било начин со европските вредности за кои Скопје официјално тврди дека тежнее. Ние од ВМРО нема да толерираме засадување на негативни чувства против Гарванлиев, само затоа што не крие дека има бугарски пасош – исто како и скоро 100.000 наши браќа таму“, наведено е во соопштението на бугарската политичка партија ВМРО.
И, ако младиот пејач се повлече од конкуренцијата, наведено е таму, ќе ја повикаме Бугарија тој да биде испратен како нејзин претставник следната година.
„Сè додека ВМРО е во бугарскиот парламент, нема да дозволиме воинствен србомакедонизам во ЕУ“, се вели во дел од соопштението на партијата предводена од бугарскиот министер за одбрана која е дел од владеачката коалиција.
