Орце Камчев беше однесен по упат од домскиот лекар и денеска е спроведен на клиниката за кардиологија каде му е извршен детален преглед од интернист-кардиолог, ни соопштија од управата за извршување санкции.
По извршените прегледи, Камчев е вратен на издржување на мерката притвор во затворот во Шутка.
-Резултатите му се одлични, за што има соодветен лекарски документ од интернистот-кардиолог кој му извршил преглед, ни истакна директорот на затворската управа Маријан Спасовски.
Адвокатот Тони Менкиновски претходно се пожали дека во затворот Шутка, Камчев е сместен во лоши услови, во тесна келија која му влијае на здравјето.Адвокатот го нарече третманот во Шутка-тортура.
Денеска Менкиновски ни рече дека утре има посета на својот клиент без да потврди дали воопшто е известен за прегледот на Камчев на државна кардиологија.
Камчев е во притвор од минатата недела откако судот му определи мерка притвор поради информации за наводно планирање на бегство, кое е нотирано од припадници на АНБ.
Осомничен е во случајот Плацеви на Водно, за што денеска обвинителството претресуваше станови поврзани со поранешниот премиер Никола Груевски во кои откри и работен кабинет и библиотека.
Пишува:Telma
