Подобрување на технолошкиот процес во Пошта е приоритет и на генералниот директор, Јани Макрадули и на Управниот одбор, а за тоа има потреба од 50-тина нови вработувања. Сепак, во овој период не се планираат толку вработувања, но се чекаат согласности.
Како компанија имаме потреба од нови вработувања, но се уште немаме објавено оглас. Старосната структура во Пошта е многу висока и 56 луѓе веќе заминаа во пензија, повеќето од нив со високо образование. Во овој период има и многу поштари разнесувачи кои го оствариле правото на пензија и заминуваат. Мораме да најдеме решение, бидејќи согласно Законот за поштенски услуги во секоја од 340-те поштенски единици мораме да имаме и поштари”, рече Макрадули по денешната работна посета на Поштата ЕПМ 1013, Шуто Оризари.
Според него, освен одењето во пензија, имаме и една појава што влијае на одвивањето на технолошкиот процес , а тоа е неплатеното отсуство.
„Согласно законот и колективниот договор повеќе луѓе го користат правото на неплатен одмор во траење од три месеци. Тоа е една негативна појава која не е присутна само кај нас, туку ја има во многу институции. Проверуваме каде се тие луѓе и дали се во државава, но сепак законот им дозволува и затоа во овој момент трпи одреден дел од доставата”, рече Макрадули.
Нагласи дека има и одредени места низ државата каде нема внатрешен кадар со високо образование што може да го префрлат или да го преместат.
