Во Општина Новаци утре ќе се одржи завршниот настан од манифестацијата Културно – забавно лето, и во општинскиот двор ќе се избира летен фолк хит за 2021 година.
Градоначалникот Љубе Кузмановски, кој заедно со општината е покровител на настанот, ги покани заинтересираните да го проследат фестивалот, на кој ќе настапат околу 20 познати музички имиња од домашната фолк сцена.
-Да бидеме одговорни и совесни и да се заштитиме. Новите мерки за заштита ќе важат при одржувањето на фестивалот, а на редарската контрола ќе треба да и приложите задолжителна потврда за извршена имунизација, најмалку прва доза, или потврда за прележан Ковид-19, првите 45 дена по прележувањето- објави Кузмановски на својата страница.
Манифестацијата Културно – забавно лето во Новаци, општина со околу 1.500 жители, на девет километри од Битола се одржува со години наназад и еден од најпопуларните настани помеѓу населението. Организатор е Модно студио Пикси, односно сопственикот на студиото Благојче Стојановски – Пикси, кој традиционално, ги носи сите попознати музички имиња пред публиката во Новаци.
Годинава на изборот на летен фолк хит ќе настапат Сузана Гавазова, Марјан Коцев, Ирена Спасовска, Сани Гроздановска, Стојне Николова, Лени Партикова, Дамјан Стојаноски, Туше, Борче Наумовски и многу други.
Настаните во склоп на културно-забавното лето во Новаци секогаш привлекуваат многу публика. Така на пример, пред две години, на отворањето на манифестацијата со концерт на Сузана Гавазова, дошле повеќе посетители, отколку што општината имала жители. Тогаш, портпаролот на општината Петар Велјановски, изјави дека имале над 3.000 посетители и над 25.000 прегледи на социјалните мрежи.
Вики Клинчарова Фокус
