Нема протоколи за амбулантско лекување, непотребно давање дупли дози на антибиотици на пациентите. Според микробиологот д-р Никола Пановски, коморбидитетите и доцното барање лекарска помош не се единствени причини за високата смртност, а додека така се правдаат надлежните, со такви паушални изјави, смртноста ќе биде висока. Ако продолжи овој тренд, според микробиологот, ќе се искачиме на врвот на листата со најголема смртност од корона вирус во Европа.
Македонија на неславното петто место по смртност од корона вирус во Европа. Загрижувачки се статистиките кои покажуваат дека во земјава се регистрирани 2775 смртни случаи на милион жители.
Не можеме да кажеме дека кога ќе ја поминеме границата, таму живеат други луѓе. Албанија, Грција, Бугарија….истите луѓе, иста храна, исти навики на живот, и баш дека ние сме тие што имаме такви хронични болести не е точно. Додека така се тврди, додека клиничките доктори се кријат, не кажуваат какви проблеми имаат при лекувањето, додека не се спореди смртноста од една до друга болница, смртноста ќе расте. Со вакви паушални изјави на надлежните, се покажува дека тие не сакаат да влезат во суштината на проблемот и ако вака продолжи за неколку недели ќе избиеме на прво место – изјави микробиологот, проф. д-р Никола Пановски.
За тоа дека нема протоколи за лекување, алармираше и Лекарската комора. Побара надлежните институции, стручните комисии и лекарските здруженија да споделат со јавноста стручни ставови за третирањето на вирусот.
Тие требаше да се донесат првите 15 дена, на Лекарската комора и требаше година и пол да го каже тоа што ние го зборуваме толку време. Во време на пандемија се кријат, не кажуваат ништо, протоколи треба да има, никој не реагира за тоа што нема амбулантски протоколи, се даваат двојни дози антибиотици непотребно, бидејќи за лекување во амбуланта, нека не кажува министерот дека има протоколи, кога ќе отворите на МЗ, нема протоколи за амбулантско лекување – вели д-р. Пановски.
