Протести против реформите, дигитализацијата на учебниците, новата концепција за прво и четврто, сексуално образование за деветто одделение, барање за Референдум, повлекување на Законот за учебници – тотален хаос, учениците збунети, родителите исплашени поради пандемијата. Едни бараат онлајн, другите настава со физичко присуство, но министерката Мила Царовска не пропушта да се пофали за успесите на МОН. Денеска учебната година почна вo училниците, за сите освен за средношколците во Тетово, Гостивар и за учениците во Струга и Кичево.
“Големо е задоволството што после година и половина, денес повторно гледаме полни училишта и училници со ученици и наставници, ја гледаме вообичаената слика на која бевме навикнати пред појавата на пандемијата. Ја започнуваме новата учебна 2021-2022 година со физичко присуство и на самиот почеток на сите ученици им посакувам многу здравје, многу нови знаења, достигнувања и успешно заокружување на уште една етапа од животниот пат. Важна е вербата во себе, а поддршката од семејствата и секако од наставниците е неизбежна, така што се надевам дека секој ученик ќе ги оствари очекувањата, поставените цели и резултатите од учењето” изјави министерката за образование и наука Мила Царовска која денеска заедно со градоначалникот на Велес Аце Коцевски и претставничката на УНИЦЕФ Патриција Ди Џовани, по повод започнувањето на учебната година го посетија основното училиште „Панко Брашнарав“.
Наставата со физичко присуство ќе се одвива со низа протоколи за кои лекарите алармираа дека нема услови да се спроведат. Јавноста и стручната фела предлагаа и ковид тестирање на наставниците и учениците кои не се вакцинирани, по примерот на другите земји во Европа, но за жал, во 38те точки од протоколот, надлежните не го ставија овој план со кој би имало поголема безбедност.
