Бил Клинтон, поранешниот претседател на САД, пред неколку дена беше хоспитализиран во Калифорнија. Неговата општа здравствена состојба е добра, јавуваат американските медиуми.
Тој бил на приватен настан за својата фондација, се почувствувал уморно, по што во вторникот е примен на одделението за интензивна нега во Медицинскиот центар Ирвин на Универзитетот во Калифорнија поради инфекција на уринарниот тракт која се проширила во крвотокот.
Лекарите соопштија дека Клинтон ќе остане во болница поради следење на неговата состојба. Тој е сместен на интензивна нега поради приватност и безбедност. Тој е добро расположен, разговара со семејството и персоналот, но и станува и шета.
„По два дена лечење, бројот на неговите крвни зрнца опаѓа и добро реагира на антибиотиците. Се надеваме дека наскоро ќе може да замине дома“, истакнаа тие.
Неговиот портпарол, Анхел Урења, објави на Твитер дека неговата состојба не е поврзана со претходните проблеми со срцето или со Ковид-19. Политичарот во 2004 имаше четирикратна операција за бајпас на неговото срце, додека во 2010 година му беа ставени два стента.
Statement, from me, on President Clinton pic.twitter.com/Jbfl4evpcF
— Angel Ureña (@angelurena) October 15, 2021
Клинтон беше претседател на САД од 1993 до 2001 година. Тој е во брак со Хилари Клинтон, која се кандидираше на претседателските избори во САД во 2016 година, но изгуби од Доналд Трамп.
