Голем број на почитувачи на ликот и делот на Тоше Проески од регионот се незадоволни од изгледот на споменикот, што беше подигнат крај Нова Градишка, на местото на сообраќајната несреќа во која тој го загуби животот.
На социјалните мрежи можат да се прочитаат огромен број на пораки, со кои се негодува поради изгледот на споменикот.
„Намерата е добра, но статуата воопшто не личи на Тоше“, напиша еден обожавател.
„Ако ова е Тоше, тогаш јас сум Пленковиќ“, „Ниту Македонците не би го препознале“, се само дел од коментарите на социјалните мрежи.
„Сакам да знам какви им биле изразите на лицата кога градоначалникот го тргнал чаршавот и ја покажал статуата“, напиша друг.
Да потсетиме, статуата на Проески ја изработи скулпторот Славко Буниќ, а на откривањето присуствуваа амбасадорот на Северна Македонија Милаим Фетаи, градоначалникот на Нова Градишка Винко Гргиќ и градоначалникот на Крушево Томе Христовски.
