Откако вчера МВР соопшти дека запленила автобус на скопска фирма поради фалсификувани податоци со регистрацијата и бројот на шасија, се јави и жртва на сообраќајна несреќа во Турција која останала без нозе во автобус на истата фирма кој бил управуван од истиот возач. Несреќата се случила во летото 2016-та,додека возачот бил приведен и прогласен за виновен затоа што од невнимание се забил во камион полн со јаглен.
Снежана Караџовска на својот ФБ профил прашува има ли правда и напиша:
-Тоа е таа фирма „Бога транспорт“ со која патував пред 5 години од Истанбул за Скопје. Во таа сообраќајка ги загубив двете нозе над колена, еден патник почина, а неколку патници беа потешко и полесно повредени. Шоферот Зоран Момировски е сопруг на сопственичката на фирмата за транспорт. Имаше забрана за возење и условна казна, но постојано возеше на иста релација.
Од МВР не споделија дали се проверени наводите на Караџовска.
Но од досега што е проверено, утврдено е дека во сообраќајната дозвола за вчера запленетиот автобус имало еден број на шасија, додека во реалноста шасијата имала друг број. Според информациите на Телма автобусот бил произведен 1996-та година, но во сообраќајната дозвола стоело дека е од 2000-та година.
Како и каде е направен овој фалсификат засега нема објаснување. Но со таква сообраќајна дозвола, автобусот марка Сетра на фирмата заедно со уште 4 други автобуси добил лиценца за меѓунарден превоз на патници. Фирмата Бога добила лиценца до 2024-та година, а конкретниот автобус иако имал лажни податоци во сообраќајната дозвола добил извод од важечка лиценца.
Во транспорт и тамошниот инспекторат провериле и утврдиле дека возачот Момировски немал сертификат за компетентност во меѓународен сообраќај односно му бил истечен во февруари оваа година и оттогаш го возел автобусот со истечен сертификат. Досега не е соопштено колку пати со таков сертификат ја минал границата.
Во архивата на судски пресуди стои казна и за фирмата Бога транспорт и за возачот Зоран Момировски кои добиле парични казни од 500 односно 100 евра за непочитување на законот за безбедност во сообраќајот. Пресудата е од 2013-та година.
Казната била изречена за прекршок поврзан со непочитување на обврската за задолжителни здравствени прегледи на возачите на автобус.
Автобусот беше запленет вчера кај Миладиновци, а МВР соопшти дека се движел за Истанбул но со фалсификувани податоци.
Миомир Серафиновиќ Телма.Тв
