Министерот за надворешни работи Бујар Османи вели дека Европската унија не смее да го остави Западен Балкан како отворена рана во срцето на ЕУ и треба веднаш да се деблокира почетокот на пристапните преговори со Македонија и Албанија, кои се блокирани од Бугарија.
Османи, на денешниот брифинг со новинарите, кажа дека Украина заслужува европска перспектива, откако вчера украинскиот претседател Володимир Зеленски поднесе барање за прием во ЕУ, но дека според редот на нештата не може да се прескокне Западен Балкан и да се оди кон периферијата на Европа.
„Првиот чекор, ургентниот чекор што треба да се направи е веднаш да се деблокира почетокот на преговори за овие две држави за да можеме и ние да помогнеме да ги превенираме евентуалните влошувања на приликите во овие две прашања. Меѓутоа, во услови кога ние имаме наша ситуација не можеме да придонесеме како што треба ако членка на НАТО овде во регионот или пак подолг кандидат за ЕУ со искуство во овие процеси. Значи, првата одлука за да се спречи влошувањето и на ситуацијата во регионот е веднаш да се започнат преговорите со Северна Македонија и со Албанија“, рече Османи.
Како што кажа Османи, ситуацијата со Украина уште еднаш алармира до ЕУ дека не смее да го остави Западен Балкан како отворено прашање и отворена рана, и оти треба под итно да се преземат сите мерки за да во регионот се внесе нова динамика која што дополнително ќе ја зацврсти улогата на ЕУ на глобалната сцена.
