Турскиот претседател Реџеп Таип Ердоган кажа денес дека Турција ќе му помогне на Косово да стане членка на НАТО.
Тој тоа го кажа по средбата со косовската претседателка Вјоса Османи во Анкара.
Ердоган потсети дека Турција беше втората земја која ја призна самопрогласената независност на Косово и додаде дека, како што тогаш не ѝ била потребна ничија дозвола, исто ќе постапи и кога Приштина ќе поднесе барање за влез во НАТО.
Додаде дека со Османи разговарал и за помош од Турција да се добијат признавања од земјите кои тоа не го направиле.
„Ние како важна земја во НАТО не гледаме ништо лошо во членството на Косово во Алијансата и го поддржуваме овој процес. Ќе преземеме чекори, како што помогнавме во процесот на признавање, истото ќе го направиме и во процесот на приемот на Косово во НАТО“, кажа Ердоган.
Тој кажа дека „искрена желба на Турција е процесот на дијалогот на Белград и Приштина што побрзо да заврши со сеопфатен договор кој ќе обезбеди стабилност во регионот“. Османи на заедничката конференција за новинари ѝ се заблагодари на Турција што е секогаш со Косово.
„Ситуацијата во Украина ја покажа потребата Косово да влезе во НАТО. Поддржувајќи го нашиот влез во НАТО, Турција дава директна поддршка на мирот и безбедноста низ регионот и на европскиот континент“, кажа Османи.
