Директорот на Регулаторната комисија за енергетика, Марко Бислимоски изјави дека граѓаните не треба да се грижат, дека нафта во Македонија има и дека нема да биде дозволено воено профитерство.
„Нафтени деривати има, трговците редовно набавуваат гориво согласно побарувачката, но дел од нив ја користат состојбата и за ‘воено- профитерство’. Дел од малите трговци не се однесуваат фер и ја ограничуваат понудата и ја користат состојбата за профитерство оставајќи впечаток дека нема гориво. Во текот на денешниот ден, добивме укажувања од поголем број на потрошувачи кои посочуваат дека одредени трговци на мало со нафтени деривати ја ограничувале количината, односно сумата до која го продаваат горивото што се точи во автомобилите. Некои бензински пумпи дозволувале до 500 денари да може едно возило да наполни гориво. Други пак не дозволуваат гориво да наполнат камионите“, вели Бислимоски.
За состојбата, РКЕ го извести Државниот пазарен инспекторат веднаш да ги засили контролите на терен кај трговците и да се оневозможи вакво непазарно однесување кое е недозволиво и забрането. „Вештачки се нарушува пазарот и се прекршуваат основните принципи за сигурност во снабдувањето со енергија“, додаде Бислимоски.
Министерот за економија Крешник Бектеши, откако беше објавено дека во некои градови се чекало во колони за да се наточи гориво, истакна дека нема простор за паника, дека има нафта и бензин.
Според Бектеши, ова е вештачки создадена ситуација.
-Се шири паника и лаги по порталите. Имаме залихи, имаме резерви. Граѓаните да не создаваат кризи и да не веруваат секому, додаде Бектеши во гостувањето на ТВ Сител.
Бектеши додава дека ограничувањата на некои пумпи кои не дозволуваат полнење на канти и туби со гориво, се спротивни на законот, но повтори дека нема потреба од паника и гужви за полнење гориво.
Телма пренесува дека возачите во Штип чекале од 10 до 30 минути за да дојдат до пумпата за да наточат гориво. Луѓето рекле дека на Фејсбук прочитале дека цената на бензинот драстично ќе скокне. Ваквата информација засега е класифицирана како лажна, ниту една институција или компанија има најавено или раширено вест дека нафтените деривати ќе скокнат или дека ќе снема залихи во складиштата.
Откако денеска во Штип се создадоа колоните од возила пред бензинските пумпи забрането е точење на нафтени деривати во туби, пред се за да не се складира и загрози безбедноста на граѓаните, пишува “Телма”.
