НБА кошаркарот на екипата на Кливленд Кавалирс, Чеди Осман, во Охрид го кажа судбоносното да, со познатата турска актерка Ебру Шахин. На скромна забава пловејки со брод низ Охридското Eзеро, се одржа венчавка, со која тие ја крунисаа својата љубов со брак. На забавата беа присутни педесеттина луѓе, роднини и пријатели, помеѓу кои и познати актери од Турција. Бродот пловеше два часа низ Охридското езеро, а на градското пристаниште дојдоа да ги испратат и одпоздрават и локалните жители на Охрид.
Свадбената веселба ќе се одржи на 7-ми јули во Чешме, Турција. Ебру и Чеди веќе неколку дена се во Охрид каде уживаат во убавините на градот. Инаку Чеди Осман до својата четири годишна возраст живеел во Охрид, од каде потоа со родителите се сели во Сараево, па во Истанбул, каде играл за екипата на Анадолу Ефес. Од 2017-та година игра во НБА лигата. Од 2007-ма година настапува и за кошаркарската репрезентација на Турција.
Автор: Мики Трајковски, Охрид- Глас на Америка.
