Младите во Охрид го добија својот центар, место каде ќе се подготвуваат и спроведуваат програми кои ќе ја подобруваат благосостојбата, развојот на личниот, социјалниот и професионалниот живот на младите, информации од важен интерес за младите и други аспекти од животот на младите. Денес градоначалникот Кирил Пецаков и претставници од Општина Охрид заедно со претставници од Коалицијата на младински организации СЕГА официјално го отворија Младинскиот Центар во Охрид, во Касарна Охрид (влез 1, кат 1).
Како локална власт, покрај законските обврски, искрено сме посветени да го подобриме животот на малдите рече градоначалникот на Општина Охрид, Кирил Пецаков.
Верувам дека младите од Охрид со нивната енергија и елан, овде ќе имаат оптимални услови за развивање на креативни идеи и реализација на проекти од најразлични области, а со тоа ќе имаат лична и професионална сатисфакција за својот ангажман, рече Пецаков.
Охрид е првиот центар во Македонија кој е поставен на стандардите на европските младински центри и од аспект на капацитет просторен, програмски и технички во смисла на опрема која ќе треба да биде неопходна за да ги исполни скоро сите можни желби или потреби за активности на младите, рече Зоран Илиески, извршен директор на СЕГА.
Функцијата на овој центар е да обезбеди место за искористување на слободното време на младите каде што преку креативен начин ќе може да учат, да ги надоградуваат своите вештини, знаења, способности и да се чувствуваат корисни придонесувајќи во општествениот живот. Ова е центар каде што активностите кои се поврзани со младите и од култура, музика, спорт, забава и креативни вештини и вештини за вработување ќе бидат на едно место и овој простор ќе даде можност за сите млади кои сакаат да се вклучат во неформално образование. За вакви центри ние во Македонија немаме историја но во Европа повеќе од 30-40 години функционираат и на локално ниво се клучно место каде што младите може да делуваат и да придонесуваат па од друга страна и за самата општина, вели Илиески.
