Министерот за правда Тупанчески во однос на најавените законски измени, вчера изјави дека нема можност за ретроактивност во ревидирање на веќе основаните фашистички здруженија, реагираат од Левица.
Но, истиот очигледно намерно заборава дека е Министер за правда на Македонија и истиот треба да ги штити интересите на македонскиот народ, како и сите нејзини определби и вредности, а особено во случајов антифашистичката определба на Македонија.
Оваа изјава доаѓа додека во соседна Бугарија се усвојуваат Декларации со кои се забрануваат отворање на македонски клубови, иако истите ги носат имињата на истакнати анти-фашистички дејци!
Основањето на фашистички здруженија со величење на бугарски фашистички ликови во Македонија стана опасен тренд, кој мора итно да се спречи. Во таа насока се најавените измени на Законот за здруженија и фондации.
Во законските измени е предложено и задолжителното усогласување на веќе основаните организации, здруженија, фондации, сојуз и други форми на здружување на своето име и/или назив, цели и дејности пред Централниот регистар во рок од три месеци.
Разгорувањето на национална омраза од страна на овие здруженија е доказ за нивното противуставно и противзаконско основање и постоење. Во таа насока Левица како политичка партија достави иницијативи за забрана за работа до Основното јавно обвинителство во Охрид и Битола за Здружението „Цар Борис III“ во Охрид и Здружението„Ванчо Михајлов“во Битола.
Но, иако се работи за национален интерес, ОЈО Битола и Охрид сѐ уште немаат постапено, додека сведоци сме како Ламбе Алабаковски експресно беше првостепено осуден.
Непостапувањето на институциите, отсуството или млаката реакција од владините функционери и пролонгирањето на законските измени само потврдува дека пробугарската коалиција на СДС и ДУИ целосно е ставена во служба на рехабилитација на фашизмот.
