Првото домашно летало на македонската авијација “Илинденка” се врати во Македонија. Изработена пред речиси 70 години, во скопската фабрика за воздухоплови “20 Мај” станала белег на Македонија, а ќе остане запаметена по своето учество на светското едриличарско првенство во Полска, во 1958 година, како дел од тогашната репрезентација на СФРЈ угославија.
Но оттогаш, таа се наоѓаше во Воено техничкиот музеј во Белград, а денеска повторно се врати во нашата земја каде што и беше произведена, а посетителите имаа можност да ја видат на спортскиот аеродром Стенковец, на аеромитингот по повод 100 години македонска авијација.
“Оттогаш до денес овој воздухоплов беше во Воено техничкиот музеј во Белград, и благодарение на одличните односи коишто ги имаме и со претседателот на Србија, со министерот за надворешни работи Србија и благодарение на нивна помош на директорот на ВТМ во Белград, овој воздухплов денес е во Скопје каде што му е и местото.”
Министерството за одбрана на Србија им ја отстапи Илинденка на организаторите на настанот, а српските власти велат ова е уште еден доказ за пријателството помеѓу Македонија и Србија.
“Илинденка на симболичен начин сведочи за блиската поврзаност на нашите две земји и во областа на воздухопловството”
Денеска на аеродромот Станековец, поранешни авијатичари кои управувале со моделите на Илинденка дојдоа да ја видат после толку години првата македонска едрилица и пред нашата камера се потсетија на авијатичарските денови.
Во чест на 100 годишнината на македонската авијација, од формирањето на првиот авио клуб денеска на аеромитингот учество земаа 30 различни воздухоплови од Македонија и од странство, едриличарите изведуваа акробатско летање, а имаше и прелети во група, како и прелети со патнички авион. Падобранците го вееја и македонското знаме при нивното слетување, а специјални гости беа воздушните сили на Грција, Србија и Италија.
