Грција станува 16. земја во ЕУ, 37. во светот, но и прва православна земја што ги легализира истополовите бракови
Грчкиот парламент синоќа со 176 гласа „за“ од пратениците на владејачката Нова демократија и опозициските Сириза, ПАСОК, Нова левица и Курс на слобода го изгласа законот за истополовите бракови, јави дописничката на МИА од Атина.
Грција станува 16. земја во ЕУ, 37. во светот, но и прва православна земја што ги легализира истополовите бракови.
Од вкупно 300 пратеници, колку што брои парламентот, гласаа 254, од кои 76 беа „против“, двајца „воздржани“, а преостанатите го поддржаа законот.
Меѓу оние што гласаа против, освен пратеничките групи на Грчко решение, Комунистичката партија, Спартанци и Победа, имаше пратеници и од другите партии меѓу кои и од Нова демократија.
Веднаш по соопштувањето на резултатите, грчкиот премиер Киријакос Мицотакис преку социјалната мрежа Икс истакна дека „Грција е горда што стана 16-та земја од ЕУ која ја легализира брачната еднаквост“, но и дека тоа ја отсликува денешната Грција: „прогресивна и демократска земја, посветена на европските вредности“.
