Методолигија може да се развие и спроведе, но тоа не пречи Северна Македонија да добие позитивна одлука сега и веднаш. Ваква порака испрати премиерот Зоран Заев по средбата со еврокомесарот за проширување во заминување Јоханес Хан.
Премиерот отпатува во Брисел во последен обид да ги убеди лидерите на европските земји да дадат „зелено светло“ за старт на преговорите. Откако министрите за надворешни работи не успеаја да се договорат, одлуката останува на лидерите.
Заев вели дека секое одложување ќе биде прочитано како негативна одлука и ќе има негативни ефекти. Како што вели тој, ќе има негативни ефекти меѓу граѓаните, но и членовите на парламентот кои гласаа за уставните промени. Потсети дека Договорот од Преспа е директно поврзан со отворањето на поглавјата за ЕУ.
„Сакам добронамерно да предупредам дека ако не се испорача очекуваната и заслужена одлука, тогаш кредибилитетот на ЕУ и довербата на нашите граѓаните кон Унијата можат да бидат ставени под знак прашалник. Ова со сигурност ќе ги потикне регресивните сили во земјата и ќе го зајакне интересот на третите страни во регионот. Ако ЕУ покаже отсуство или слабост за Западен Балкан, тогаш третите страни ќе го пополнат ваакумот. Затоа, почитувани лидери на ЕУ немојте да ги гасите светлечките ѕвезди кон кои се стремиме. Немојте да станувате нашата пречка.“, рече Заев од Брисел.
Еврокомесарот за проширување во заминување Јоханес Хан изјави дека очекува во наредните два дена, сепак, да има зелено светло од лидерите на земјите членки на ЕУ. Како што вели Хан, досега на ниво на министри за надворешни работи се сретнале три пати во изминатите 16 месеци, но не било возможно да биде донесена едногласна одлука за Северна Македонија и Албанија. Хан порачува дека не станува збор за отворање или стартување на преговорите веднаш следната недела, туку дека се работи за испорачување на ветувањата за сето она што го направиле овие две земји врз база на она што било побарано од нив.
„Не зборуваме за отворање или стартување на преговорите веднаш следната недела. Се работи за јасен сигнал за посветеноста на Европската перспектива на земјите како што се Северна Македонија и исто така Албанија. Ова е она на што сметаме, што можеме да очекуваме, по сите пораки од добиени за двете земји. Ние досега се сретнавме три пати во текот на 16 месеци на ниво на Совет на министри за надворешни работи, досега не беше возможно да донесеме одлука, сега е на ниво на лидери“, рече Хан.
Евокомесарот порача дека двете земји, особено Северна Македонија, испорачале речиси се од она што било побарано од нив, затоа сега на ред е ЕУ да го исполни своето ветување.
