Социјална работничка од Прилеп, била застрелана од лице кое избегало од Лудница, истиот требало да лежи и во затвор но одлуката не била правосилна !!

– Социјална работничка од Прилеп, застрелана со огнено оружје на своето работно место –
36-годишната социјална работничка М.Ѓ. од Меѓуопштинскиот центар за социјална работа во Прилеп, денеска нешто пред 14 се здобила со прострелни рани во пределот на стомакот, откако во неа пукал со пиштол 50-годишниот прилепчанец А.Ј. Повредената веднаш е префрлена во прилепската болница каде и се санирани повредите и е надвор од животна опасност, информираат од болницата. Додека лицето кое пукало со оружјето за кое немало дозвола, веднаш е совладано и приведено од Полицијата. Според Јавниот обвинител Стевчо Биноски, станува збор за осудувано лице кое пред четири дена избегало од Психијатриската болница во Демир Хисар, каде се лекувало од алкохолизам.
„Сега повредената социјална работничка, претходно била дел од тимот социјални работници кои одредиле извесни мерки против осомничениот, а кој на повеќе наврати бил пријавуван од неговата поранешна сопруга за семејно насилство. Во претходниот период, закани добивала и социјалната работничка за што таа и го пријавувала, а случајот завршил и пред прилепскиот Основен суд каде на осомничениот му била одредена и затворска казна, но таа се уште не е правосилна. А во меѓувреме му е одредена итната мерка – задолжително лекување во Психијатриска болница во траење од 15 месеци од каде на 20-ти месецов, тој побегнал“, – вели јавниот обвинител Стевчо Биноски.
Случајот го потврдија и од СВР Битола од каде велат дека лицето е лишено од слобода, и кај него освен пиштолот со кој пукал, бил пронајден и нож. Се преземаат мерки за расчистување на случајот, а повредената социјална работничка е задржана на понатамошно лекување во прилепската болница.
„Примена е со прострелна влезно-излезна рана и е во шок-соба. После направените испитувања – компјутер на граден кош и абдомен, утврдено е дека нема повреда на бели дробови, на абдомен, на ребра. Раната е поткожна. Пациентката е примена за понатамошни иследувања. Во моментов е во стабилна состојба која не е животно-загрозувачка“, – изјави д-р Кире Јоноски, директор на прилепската болница.
Каролина Дурло/ТВ АЛФА