Вработените во основните и средните училишта во Струмичкиот регион денеска штрајкуваа и не одржаа настава на првиот ден од новата учебна 2019/2020 година.
Одлуката на СОНК за предупредувачки штрајк се почитуваше во сите училишта во општините Струмица, Василево, Босилово и Ново Село. Имаше исклучок кај одделенски наставници кои ги примија првачињата, а некаде наместо наставник ги прими директорот на училиштето, вели претседателот на Регионалниот синдикат на СОНК, Никола Џорлев. Вработените беа на своите работни места, во училиштата, но не ја почнаа наставата во училниците со своите ученици. Немаше ни многу ученици, некои дојдоа, некои не.
На денешната традиционална приредба за првачињата на која градоначалникот на Струмица ги поздравува и им посакува успешен старт на школскиот живот, имаше малку учителки кои ќе водат првачињата во оваа учебна година, повеќето останаа да штрајкуват во училиштата, а децата си дојдоа со своите родители.
„Бидете секогаш послушни, добри и вредни ученици. Внимателно следете ги вашите наставнички во нивното несебично дарување на знаењата. Бидете активни и отворени на секој час и секогаш извршувајте ги вашите училишни и домашни задачи. Само така ќе напредувате во вашето образование и ќе си ги отворате убавите патиштата на животот. Како што растете, така нека растат и вашите амбиции, еден ден да станете успешни и почитувани луѓе“ – им посака на првачињата градоначалникот на Струмица, Коста Јаневски.
Од утре наставниците започнуваат со реализација на наставната програма за новата учебна година. СОНК и МОН во месец септември ќе преговараат за покачување на платите. Доколку не се договорат, Синдикатот на СОНК најави дека на 1 октомври ќе започнат со генерален штрајк во сите основни и средни училишта на територијата на целата држава и ќе трае се до исполнување на нивните основни барања.
