Го конструираше првиот 4х4 и хибриден автомобил, победничките болиди на Mercedes и „Сребрените стрели“ на култниот Auto Union, се прослави со „Буба“ на Volkswagen, а го дизајнираше и еден од најмоќните тенкови на сите времиња – Tiger I.
Германецот Фердинанд Порше (1875 – 1951), најголемиот конструктор на автомобили во историјата е роден на денешен ден пред 144 години во близина на Либерец, денешна Чешка, тогаш дел од Австро-Унгарија.
Славата започна да ја гради во 1901-ва година во Виена со електрично-бензинскиот Lohner-Porsche Mixte, првиот хибриден и првиот 4х4 автомобил на светот, а и подоцна и работејќи за Daimler во Штутгарт, како и за Austro-Daimler и Steyr во Австрија.
Во 1918-та година избрал чехословачко државјанство, а славата и угледот ги стекнува во 1920-та со проектирањето на победничките серии на Mercedes S, SS и SSKL. Потоа беше главен конструктор на славната компанија Daimler-Benz, а кон средината на 30-тите години од минатиот век се прослави со тркачките болиди на Auto Union кои воведуваат револуционерна алуминиумска школка и мотор во средината.
Моделот од 1936-та година развивал импресивни 590 коњски сили од 6.0 V16 бензинец и можел да развие до 330 километри на час.
Кога започнал со работа на проектот KdF-Wagen, Хитлер и Гебелс инсистирале и официјално да стане Германец. Моделот KdF (Kraft durch Freude, на германски „Моќ преку радост“) со непотпишано користење на идеите на Евреинот Јозеф Ганц и Австриецот Ханс Ледвинке, стана култната „Буба“ на Volkwagen, автомобил со најголема серија на производство на сите времиња.
Германскиот „народен автомобил“ беше претставен во 1938-ма година, додека во истиот период неговите Auto Union болиди бележеа бројни успеси. Семејната компанија Порше под водство на синот и внукот на Фердинанд ќе прерасне во една од најмоќните компании на светот – еден од најпознатите производители на спортски автомобили, што започна во 1948-ма година со моделот Porsche 356.
Почина на 30-ти јануари 1951-ва година. Иако го следат и големи контроверзии, од обвинувања за плагијат, па се до поддршка на Нацизмот (го конструираше познатиот Tiger I, најдобриот тенк во Втората светска војна), поради што кон крајот на 1945-та година беше уапсен и помина 22 месеци во затвор, сепак Фердинанд Порше се смета за најзначајниот автомобилски конструктор на сите времиња.
