„Преспански херој“ го нарече јавноста откако со своите подвизи покажа како е да им се пркоси на предрасудите и попреченоста. Васил Јанкула роден со церебрална парализа – помина повеќе од 3 илјади километри со својот трицикал низ цела Македонија, лета со параглајдер, плива, планинари, ужива во кајакарството, а се подготвува да скокне и од авион. Сите предизвици вели се помали од оној најголемиот – да се рушат општествените ѕидови од предрасуди за лицата со попречености.
„Сакав да испратам порака до општеството, лично за сите лица со попречености. Затоа што само ни ветуваат, а ништо не прават. Значи, не’ имаат шутнато како топка…“ вели Васил Јанкула.
Неговото име ретко кој не го чул, а по последниот успех од извозени 800 километри за една седмица – го посети лично и претседателот. Сепак, денеска вели се чувствува уморен, а ниту неговата нога веќе не може да го издржи притисокот. Но, најмногу го боли разочарувањето и односот од државата во која се чувствува невидлив.
