Четворица од петмината врз кои во неделата беше пукано во лобито на хотелот „Александар палас” им се заканувале на полициските службеници кои дошле да ги легитимираат критичната вечер, но и по настанот.
Вчера во полициската станица Карпош беа приведени тројца од осомничените и спроведени, по што следуваа и кривичните пријави. Едно лице е во бегство.
Од обвинителствотоо соопштија дека тие ќе одговараат за загрозување на безбедноста.
„СВР Скопје поднесе кривична пријава до Основното јавно обвинителство Скопје против четири лица за кривично дело – Загрозување на сигурноста од чл.144 ст.3 од Кривичниот законик, во врска со настанот од 30 ноември околу 11 часот во хотелот „Александар Палас“ во Скопје. Тројца од пријавените се лишени од слобода, а по четвртиот сѐ уште се трага. Пријавените ја загрозиле сигурноста на 11 службени лица – полициски службеници кои вршеле службено дејство – легитимирање, на начин што упатиле сериозна закана дека ќе нападнат врз животот на полициските службеници“, стои во соопштението на обвинителството.
Од Обвинителството побарале да им се одземат пасошите и да им се одреди куќен притвор.
МВР засега нема осомничени за нападот во Александар Палас.
Инцидентот се случи во неделата, триесетина минути по полноќ, кога три маскирани лица, вооружени со автоматски пушки упаднаа во лобито на хотелот каде што биле осомничените и полициски службеник кој не бил на должност. Тие испукале неколку рафали кон нив и побегнале, а полицискиот службеник возвратил пукајќи од службениот пиштол.
Напаѓачите побегнаа со две возила, а едното – џип „туарег“ беше најдено по неколку часа целосно изгорено во атарот на селото Арачиново. Во запалениот џип беа најдени и две автоматски пушки „калашникови“.
