Две персонални асистентки кои ќе ги плаќа државата добија Ристе и Влатко Димитријевски од Велес. Денеска беше нивниот прв работен ден во домот на браќата, кои болеста веќе 27 години ги врзала за кревет.
Нивната мајка Лиле е задоволна што ќе добие одмена, бидејќи грижата околу нејзините синови не е нималку лесна работа за 64 годишна жена.
Двете асистентки ќе им помагаат вкупно осум часови дневно. Кога нашата екипа пристигна во домот на Димитријевски, ја затекна асистентката Весна Тошева, која примаше инструкции од Лиле околу начинот на грижа за Ристе и Влатко. За Тошева, ова е прво искуство на новата работа, откако пред извесно време завршила курс за персонален асистент и се здобила со сертификат.
Асистентите се ангажирани, откако пред дваесеттина дена преку Телевизија 24 мајката Лиле апелираше до државата под итно да и обезбеди помош околу грижата за нејзините двајца синови, бидејќи е на крајот од силите.
Од Центарот за социјални работи во Велес велат дека ги отстраниле меѓуинституционалните проблеми кои биле пречка асистентите да почнат со работа. Во исто време, ги потсетуваат сите невработени дека освен хуманиот повик, ова е и шанса за нивно вработување.
Лиле Димитријевска вели дека сега, со парите кои претходно ги даваше за помошничка, ќе може да плаќа физиотерапевт, кој наместо еднаш како досега, ќе доаѓа кај Ристе и Влатко повеќепати во неделата.
