Правникот Бошко Жупановиќ поднесе пријава против хрватската пејачка Јосипа Лисац за нејзината изведба на хрватската химна на инаугурацијата на новоизбраниот, петти по ред претседател Зоран Милановиќ. Јосипа Лисац пред два дена, на инаугурацијата на хрватскиот претседател Зоран Милановиќ, ја отпеа хрватската национална химна „Лијепа наша домовино“.
Во пријавата пишува дека Лисац ја извела химната на Република Хрватска на „навредлив и омаловажувачки“ начин и со тоа го нарушила угледот на државата користејќи „навредливи артикулации и тоналитети“.
Јас не сакам медиумско внимание. Го направив тоа како адвокат и граѓанин. Мислам дека тоа е обично исмејување и дека не прилега за никаков настан, а камоли за инаугурација на избраниот хрватски претседател, рече Жупановиќ за Индекс, додавајќи дека ова го смета за своја граѓанска должност.
Нешто слично се случи слично кога нашата пејачка Тамара Тодевска на приемот во Амбасадата на САД во Скопје по повод 4 Јули, Денот на независноста не отпеа четири стихови од официјалната државна химна, притоа изоставајќи го делот каде се спомнуваат народните херои.
Таа го испушти делот со „Гоце Делчев, Питу Гули, Даме Груев, Сандански!“ којшто следува по стиховите – „Одново сега знамето се вее, на Крушевската Република!“, а во нејзината изведба го немаше ниту делот „Горите Македонски шумно пеат, нови песни, нови весници!“, пред „Македонија слободна, слободно живее!“.
