Според најновите податоци, во светот досега се регистрирани 400.412 луѓе заразени со новиот коронавирус. Од нив починати се 17.451, а оздравеле 103.748 лица.
– Бројот на починати од коронавирус во Унгарија се зголеми на девет., а регистрирани се 187 случаи на заразени.
– Белгиските полициски власти констатираа дека од 13 март, откако се воведени посебните мерки за спречување на ширењето на Ковид-19, во државата е намален бројот на криминални дела и тоа за 30 отсто.
– „Ер Србија“ со цел да им помогне на сите патници чии летови се откажани поради измените во авиосообраќајот поради пандемијата на Ковид-19, а кои не се сигурни за термин на следното патување, подготви специјален ваучер. Патниците со тој ваучер ќе можат да купат билети за патување во друг термин. Ваучерот е во вредност од цената на билетот, кој патниците веќе го поседуваат, зголемена за 10 отсто од вредноста на нето тарифата и таксата за гориво, а важи една година од датумот на издавањето.
– Во Романија 762 лица се заразени од коронавирусот, а осуммина починаа. Меѓу заразените има 103 здравствени работници.
– Египет ќе воведе двонеделен полициски час со цел да го спречи ширењето на Ковид-19. Полицискиот час ќе трае од 19 навечер до шест часот наутро.
– Бројот на потврдени случаи со коронавирус во Холандија е зголемен за 811, што е пораст од 17 отсто во однос на претходниот ден. Со тоа вкупниот број на заболени во земјата достигна 5.560. Пријавени се нови 63 смртни случаи, а вкупната бројка сега е 276 починати.
– Руските туристи од крузерот „Коста луминоза“, кој е закотвен во италијанското пристаниште Савона, вчера го напуштија бродот и се наоѓаат на пат кон Рим, каде ќе бидат ставени во карантин, соопшти амбасадата на Русија во Италија.
– Јужна Африка има 554 случаи на заразени со коронавирус, за разлика од вчерашната бројка од 402 случаја.
– Британската полиција ќе ги казнува своите граѓани со 30 фунти на самото место доколку не ги почитуваат препораките воведени вчера.
– Саудиска Арабија го регистрира првиот смртен случај од коронавирус.
– Холандската Влада донесе одлука да го откаже годинешното полагање на државната матура поради епидемијата на коронавирусот.
MИА
