Во понеделник ќе се направи конечна проценка дали е потребно продолжување на кризната состојба во двете општини, но фактот што осми ден по ред нема нов случај на заразен со коронавирус оди во прилог на одлука да не се продолжува кризната состојба
Истекоа 30. дена во кои, според одлуката на Владата, на територијата на општините Дебар и Центар Жупа беше на сила кризна состојба. Денешниот (11 април) беше последниот ден од тој период по одлуката донесена на 13 март, која стапи на сила веднаш.
Тоа значи дека де јуре во Дебар и во Центар Жупа веќе нема кризна состојба. Сепак, со оглед на полицискиот час на територијата на целата држава, завршувањето на важноста на одлуката за кризна состојба, не значи ништо во практична смисла за жителите на двете општини, барем во текот на викендов.
Дали дефинитивно во Дебар и во Центар Жупа ќе важат мерките што се применуваат и во другите општини или, сепак, ќе биде продолжена кризната состојба, ќе се знае в понеделник. Извор од Владата за „360 степени“ најавува дека тогаш ќе бидат направени последните проценки и консултации и ќе се донесе конечна одлука.
Состојбата на терен и фактот што веќе осми ден по ред нема нов случај на заразен со коронавирус од двете општини одат во прилог на одлука да не се продолжува кризната состојба.
Во моментот кога беше прогласена кризна состојба имаше 11 регистрирани случаи на ковид-19 во тој регион од вкупно 13 во целата земја. До денеска во Дебар и Центар Жупа има 49 заразени со коронавирусот од кои четворица починаа.
„360 степени“
