Бугарската академија на науките (БАН) во фамозната книга „За официјалниот јазик на Република Северна Македонија“ не го присвојува само македонскиот јазик, туку тврди дека и српскиот произлегол од бугарскиот.
Во неодамна објавеното дело БАН наведува дека се бугарски корените на јазикот во краиштата од Дунав до Гевгелија и од Копаоник до Тимок, Пчиња и Охрид.
За ова здружението „Спона“ од Македонија ја известило Српската академија на науките и уметностите (САНУ) да реагира, а тоа го стори Виктор Савиќ од Институтот за српски јазик на САНУ и од катедрата за српски јазик на Филолошкиот факултет во Белград.
Тој за ТВ Прва ја нарекува „памфлет“ книгата на БАН и вели дека српскиот јазик, како и сите словенски јазици, потекнува од прасловенскиот и оти во времето кога се формирал српскиот, Бугарите воопшто не биле Словени.
Савиќ додава дека Бугарите дошле подоцна од Србите на Балканот и оти тогаш ѝ припаѓале на турската група народи, како и некои други номади што поминувале во овие краишта.
„Словените кои се нашле на територијата на Бугарија во тој момент се асимилирале и почнале да се идентификуваат како Бугари, додека нашиот идентитет се формирал исклучиво како српски“, објасни историчарот на српскиот јазик.
Еден дел од српските говори им припаѓа на призренско-тимочките говори, кои се формирале на територијата на денешна Метохија, па со миграциите се развлекле и до Софија и малку на територијата на денешна Македонија, наведува Савиќ и додава дека Бугарите сметаат дека овој говор е всушност бугарски, бидејќи има поедноставна граматичка структура и личи на нивниот јазик.
