Новите униформи на македонските војници сè уште без идентитет, име и држава. На истите го има само македонското знаме и чинот на припадниците на Армијата. Иако никаде не пишува чија земја ќе бранат војниците, министерката Шеќеринска им порача дека така ја личело Армијата, посакувајќи им, со здравје да си ја носат новата униформа.
“Ви посакам да ја носите оваа униформа со чест и достоинство и како силно и секојдневно потсетување дека посветената работа секогаш носи резултат” – изјави министерката за одбрана Радмила Шеќеринска.
За разлика од припадниците на Армијата, полициската униформа е со новото име на државата. Согласно доворот од Преспа власта го смени името во уставот, на личните документи, патоказните табли, граничните премини, аеродромите, државните институции. Македонија стана Северна, државјанството македонско/граѓани на Република Северна Македонија, јазикот македонски, но со фуснота дека припаѓа на словенската група јазици. И во свидетелствата на учениците веќе се применува новото име.
Табли за дообјаснување на споменици дека и припаѓаат на античката хеленска историја, нови регистарски таблички, во превод – новата придавка ја имаме секаде, па дури и онаму каде се уште не сме обврзани. Сепак сегашната влада побрза и овие обврски да ги исполни. Дури и сонцето од Кутлеш се отстранува од сите јавни простори. И на продуктите произведени кај нас веќе стои новото име.
Инаку, на денешната промоцијата на новите униформи Шеќеринска го дискредитираше Синдикатот за одбрана и безбедност, со тврдење дека нема членови и е во фаза на распаѓање. Ова следи откако Синдикатот неодамна изрази револт поради двојните аршини во Министерството. Велат, немале ниту денар за додатоци и надоместоци на плата, но затоа во тимот на министерката редовно си земале пари за надоместоци и прекувремена работа.
Ања Василева
алфа тв
