Белата течност во Брегалница потекнува од фабриката „Техникал“ во ТИРЗ зоната кај Штип, а по каналот за атмосферски води од неколку километри вчера околу 17 часот истекла во коритото на реката, рече градоначалникот на Штип Благој Бочварски. Непријатната реа се чувствуваше и во текот на ноќта, не само покај реката, туку и во подалечните населби.
„По синаќашниот увид, инспекторите констатираа дека транспортната фирма добавувач на течност која се употребува во производствениот процес на фабриката ‘Техникал’ имала пукање на цевката, па белата течност по атмосферскиот канал се слеала во реката Брегалница. Очекуваме утврдување на фактите и брзо затворање на постапката“, вели Бочварски, кој апелира до надлежните инспекторати да утврдат за какво загадување се работи и колкава е можната штета по живот свет во реката и по луѓето, и „по словото на законот да изречат казни на сите кои се инволвирани во случајот“.
Во врска со водата за пиење, Бочварски рече дека стручни лица од Секторот за јавно здравје и од ЈП „Исар “ извршиле контроли на влезната и излезната вода на филтер станицата и дека засега нема никаква опасност по здравјето на граѓаните, затоа што рени бунарите покрај реката Брегалница биле добро заштитени и се на повисоко ниво, но и редовно ќе се врши контрола на сите води што доаѓаат до филтер станицата во Штип.
„Техникал“ е една од трите компании кои имаат свои фабрики во ТИРЗ зоната кај Штип. Произведува фиберглас мрежа за изолациони системи и фасади. Производствениот процес барал употреба и на некои посебни хамикалии, па за тие потреби фабриката со деловни партнери превозници ги набавувала потребните течни материјали неопходни за производството.
izvor – sdk.mk
