– Во Вевчани денеска почнува 10-тиот Фестивал на народна култура „Пображење“, во организација на Културно-уметничкото друштво „Дримкол“ од Вевчани.
Оваа година поради пандемијата со коронавирусот, програмата е редуцирана и прилагодена во согласност на новонастанатата ситуација и ќе се реализира под строги мерки и протоколи пропишани од Министерството за здравство. Но, и покрај ваквата ситуација, организаторот во чест на десетгодишниот јубилеј најавува програма како што му доликува на нивото на овој фестивал.
Фестивалот ќе почне вечер, во 19:30 часот, со свечено отворање во центарот на Вевчани со вевчанските зурли и топани и пејачката група Каданка. На отворањето ќе се обрати Мирјана Мирчевска, етнолог/антрополог, член на организацискиот одбор на фестивалот.
По свеченото отворање, во 20:00 часот во амфитеатарот во Вевчани, во дворот на црквата „Успение на Пресвета Богородица“ ќе биде отворена изложбата „1.000 години Бигорски манастир“, на која ќе бидат прикажани избор од најстарите и уникатни икони на нашето големо македонско духовно светилиште, Бигорскиот манстирот.
На спортското двориште утревечер, од 20:00 часот, ќе биде вечер посветена на традиционалната музика и песна на која ќе настапи Ансамблот „Македонија“ со презентација на чалгиската, вокално – традиционалната и зурлаџиско – тапанџиската традиција на нашата земја. Бројот на седишта ќе биде според пропишаните протоколи и ограничен за публика. За таа цел организаторот овозможи директен пренос онлајн преку Јутјуб каналот на КУД „Дримкол“, како и преку регионалниот кабловски оператор.
Фестивалот завршува в среда со третата фестивалска вечер на празникот Преображение Христово во 20:00 часот на националната телевизија НАША ТВ, како и со онлајн фестивалска програма на која ќе учествуваа: КУД „Дримкол“- Вевчани, КУД „Светозар Марковиќ“- Србија, Ансамбл „Македонија“, „Ла Капуљеро“- Франција, КУД „Илинден“ – Битола, „Тиера Местица“ – Мексико, ФС „Блажевски“- Скопје.
Оваа година во програмската содржина „Народната култура во Вевчани, инспирација за ликовните уметници“, учесник ќе биде ликовниот сликар и ликовен педагог Даниел Тодоровски од Кратово.
Фестивалот е поддржан од Министерството за култура на Република Северна Македонија и Општина Вевчани.
