Утринава осамна Фејсбук статус на револтиран граѓанин на кого полициски службеници му напишале казна.
Имено, настанот се случил околу 10:00 часот во кривопаланечката општина Ранковце кога сторителот излегол од своето возило без да ја стави маската за заштита, а истата ја носел во задниот џеб. Двајца полициски службеници, од кои едниот е командир, му наредиле да стави маска на што тој се сложил и веднаш ја извадил. Во моментот кога ја ставал маската, истата се скинала и пред очите на полициските службеници започнал да ја преврзува за да ја стави, а едниот од полициските службеници му побарал лична карта и му напишал казна, додека сето тоа се случувало пред десеттина сведоци оддалечени од нив на околу 7-8 метри.
Како што дознаваме од очевидци, лицето на кое што му напишале казна за неносење на заштитна маска отпосле влегло и во вербална расправија со службениците бидејќи сакале да му напишат и казна за неносење на лична карта, а истиот им го кажал бројот на личната карта и им предложил да ја проверат точноста на податоците. Спорно во вториот наводен прекршок е тоа што според законот е дозволено движење на лица без документ за лична идентификација до 100 метри од својот дом, додека од местото на настанот до домот на лицето во конкретниот случај нема ниту 100 метри.
