Укинат е притворот за браќата Нефи и Ибро Усеини, кои се осомничени за физички напад на свој сограѓанин. Браќата Усеини понудиле гаранција во недвижен имот во вредност од 850 илјади евра, односно по 425 илјади евра за секој, потврдија за „360 степени“ од судот во Охрид.
Поради високата гаранција што браќата Усеини ја понудиле, кривичниот совет на охридскиот суд ја прифатил и од вчера за нив е укината мерката притвор.
Од судот во Охрид велат дека нема други дополнителни мерки бидејќи гаранцијата во недвижности е висока и доколку не се појавата на закажаното рочиште ќе се активира хипотека.
Претходно, браќата понудија гаранција од по 15 илјади евра во готово за да им биде заменет притворот со друга поблага мерка, но иако судот прифати, битолската Апелација го укина решението.
Првото рочиште е закажано за 22 септември.
Усеини беа осомничени и за недозволено држење оружје, но сега обвинението се однесува само за насилство. Ова следува откако во меѓувреме случајот доби поинаков тек, односно охриѓанецот кој беше нападнат од браќата подоцна го смени исказот и тврдеше дека написите во јавноста се извадени од контекст. Во својата изјава вели дека во расправијата не видел оружје и дека се работи за недоразбирање кое е надминато и дека Усеини бил и ќе биде негов пријател.
СПОДЕЛИ
