Африканскиот гигантски торбаст стаорец Магава беше награден со престижен златен медал за неговиот придонес во пронаоѓањето мини во Камбоџа. Магава откри 39 мини и 28 парчиња други неексплодирани убојни средства.
Британското ветеринарно хуманитарно здружение ПДСА му додели златен медал за „неговата пожртвувана должност во спасување животи и расчистување на смртоносни мини во Камбоџа“, пренесува Би-Би-Си.
Се проценува дека во таа азиска земја има до шест милиони мини.
Во златниот медал се врежани зборовите „За храброст или посветеност на должноста“. Од 30 животни кои го добиле медалот, Магава е првиот стаорец.
Седумгодишниот глодар беше обучен од белгиската хуманитарна организација „Апопо“, со седиште во Танзанија. Организацијата обучува огромни африкански торбести стаорци, познати како „херојски стаорци“, уште од 90-тите години за откривање на нагазни мини и туберкулоза кај луѓето.
Животните поминуваат низ едногодишна обука.
„Овој златен медал е голема чест за нас, но исто така и за луѓето во Камбоџа и за сите луѓе ширум светот кои се соочуваат со опасностите од нагазни мини“, вели извршниот директор на „Апопа“, Кристоф Кокс.
Специјалист за откривање мини
Магава, кој е израснат во Танзанија, тежи околу 1,2 килограми и е долг 70 сантиметри. Иако е поголем и потежок од другите видови стаорци, Магава е сè уште мал и лесен за да не ги активира мините доколку ги нагази.
Стаорците се обучени да го користат своето извонредно чувство за мирис за да детектираат хемиски соединенија во експлозиви и да го игнорираат металот во земјата, што често ги забавува човечките екипи во расчистувањето на областите од мини.
Кога ќе пронајдат експлозивна направа, тие почнуваат да ја гребеат површината за да ги предупредат своите колеги-деминерите.
Магава може да пребарува поле со големина на тениско игралиште за само 20 минути, додека еден човек со детектор за метал помеѓу еден и четири дена.
