Еден верник имал неверојатна среќа за време на гранатирањето на црквата на Исус Спасителот во Нагорно-Карабах. Имено, верникот бил спасен од Библијата во која се забил шрапнел кој речиси сигурно ќе бил фатален по него.
Младиот Ерменец бил во црквата која се најде на мета на азербејџанската армија и во рацете држел Библија во која се забил шрапнелот на гранатата.
На социјалните мрежи се појавија и фотографии од Ерменецот кој моментално се опоравува во болница, како и фотографии од Светото писмо на кои се гледа како е забиен шрапнелот.
Да потсетиме, црквата на Исус Спасителот речиси беше целосно уништена во гранатирањето на азербејџанските сили. Станува збор за светско културно наследство, а била изградена во периодот од 1868-ма до 1887-ма година.
Црквата е седиште на епархијата на Нагорно-Карабах при Ерменската православна црква и досега им одолеваше на сите конфликти помеѓу Ерменија и Азербејџан во изминатите три децении.
За среќа иако црквата претрпе сериозна штета, ниту една од иконите и мозаиците не биле оштетени.
Инаку, Ерменците се најстариот христијански народ на светот. Кралството на Ерменија го усвоило Христијанството како службена религија уште во четвртиот век. Со текот на годините, големото кралство на Ерменија се намалувало, а на неговото место доаѓале големите царства – Отоманското и Персиското.
За време на Првата светска војна, над Ерменците е спроведен систематски геноцид од страна на Османлиското царство, а интересно е тоа што денес Турција е директен поддржувач на агресијата на Азербејџан врз етничките ерменци во Нагорно-Карабах.
Извор Точка.мк
