Претходно синот на бајрам, Габриел на социјалните мрежи апелираше до присутните за придржување до мерките за КОВИД 19, да носат маски и да држат дистанца.
-Со почитувањето на овие препораки ќе покажеме почит кон нашиот великан и татко, и нема да оставиме можност овој тажен ден за семејството и ромската нација да биде оцрнет.
Поворка до вечно почивалиште тргна од семејната куќа на во Бутел.
Од Управата на градските гробишта Бутел ја демантираа веста дека поранешниот пратеник ќе биде погребан во Алејата на великаните, туку во делот на гробиштата наменет за исламски верници.
Амди Бајрам почина вчера во приватна клиника во Скопје. Попладнето беше соопштено дека посмртниот тест на Бајрам покажал дека тој бил заразен со Ковид 19. Неговиот син Габриел во меѓувреме за „Фокус“ изјавил дека неговиот татко пред 3 дена направил тест и истиот бил негативен, а од болницата им рекле дека Бајрам починал од мозочен удар, а не од коронавирус.
Долгогодишниот политичар пред една недела беше на свадбата на неговата внука која се одржа во Турција, а на која присуствуваа 600 гости, од кои половината од Македонија. Директорот на Центарот за јавно здравје Скопје, доктор Александар Стојанов препорачува сите луѓе што од Македонија отпатувале на свадбата да бидат изолирани дома, додека екипите од ЦЈЗ да постигнат да ги анкетираат и да ги најдат оние што се во висок ризик да бидат заразени со Ковид 19.
-Центарот за јавно здравје во Скопје прави напор за спроведе епидемиолошка анкета на контактите во изминатите денови , но дел од членовите на семејството Бајрам не сакаат да соработуваат. – вели за Канал 5 директорот Стојанов.
Во Шуто Оризари денеска е ден на жалост, а Советот на општината одржа комеморативна седница по повод ненадејната смрт на поранешниот пратеник и лидер на“Сојузот на Роми”.
kanal5
