Петардите од денес се забранети со закон во Хрватска, а Здружението „Пријатели на животните“ ги повика граѓаните да ги предадат останатите количини на полицијата или да ги вратат во продавниците каде што ги купиле.
Од денес стапи на сила законската забрана за продажба и употреба на петарди и шаржери од категориите F2 и F3.
Од Здружението наведуваат дека слабиот одзив на апелите да не се фрлаат петарди, особено ако се земе предвид вознемиреноста кај населението поради неодамнешниот земјотрес, е уште една причина зошто е важна законската забрана и зошто тоа е единствениот ефикасен и неопходен начин за заштита на граѓаните и животните.
„Пријатели на животните“ посочуваат дека овој ден е значаен за Хрватска, за сите нејзини граѓани, како и за сите животни и тие сметаат дека ова е само првиот значаен чекор за целосно коригирање на Законот за експлозивни материјали во насока на целосно ограничување на употребата на пиротехнички средства.
Според Здружението, пиротехниката е опасна кога е во рацете на граѓаните, а доказ за тоа се бројните повреди на деца, возрасни и животни.
